كنت قد أنهيت عملي في مساء ذلك اليوم .. وكالعادة أمضيت وقتاً طويلا مع المواصلات كان آخرها المترو .. وبقى أن أمشي فقط لمدة عشر دقائق لأصل للبيت .. ولأني أحب هذا الاختراع الصغير المسمىّ بالــتوك توك .. أشرت لواحد منهم ليقلني الي البيت .. فأنا أجد متعتين في التوك توك أولهما أنه يقلني للبيت والثانية أنه مثير جداً .. اعتدت أن افعل ذلك في أيام عدة مقابل زوج من الجنيهات أعطيهم لسائق التوك توك .. وصلت تحت البيت بالتوك توك وبقى أن أحاسب السائق الذي كان أصلع الرأس ويحمل على جبهته خطان متوازيان لجرح قديم (بشلة) مما يعطيك ايحائاً بالشر .. أخرجت كالعادة زوجاً من الجنيهات وأعطيتهم للسائق وجرى الحوار :
******** المشهد الأول ********
سائق التوك توك: ايه دول انشاء الله ....؟
أنا : دي فلوس !
سائق التوك توك: ياعم خلي عنك خالص .. أصل دي مسألة تقدير ...
أنا: طب انت عايز ايه ؟!
سائق التوك توك: ماهو انت لازم تقدّر شوية .. شوف انا جايبك منين...
أنا: (بإرهاق) طب خد ادي 3 جنيه أهو ..
سائق التوك توك: برضه ماينفعش .. خلي عنك يابيه خلاص ..
أنا: انت كده عايز تاخد اكتر من حقك !
سائق التوك توك: والله ده نظامي .. وخلي عنك يابيه مش عايزهم خلاص... (واستعد لمغادرة المكان)
أنا: (بغضب) ده آخر كلام !
سائق التوك توك: آه يابيه خلاص مش عايز.
أنا: شكراً يااسطة .. سلام ..
**************************
دخلت شقتي وانا افكر فيما فعلت .. فمن الظلم ألا أعطي السائق مالاً .. ولكنه كان متحذلقاً .. وبعد مضي ربع ساعة كنت ابحث فيها عن ملابسي التي عادة ما لا أذكر أين وضعتها .. سمعت صوتاً أسفل المنزل ينادي ويقول ... يا أستااااااااذ .. يا أستاااااااااااااااااذ .. فنظرت لأجده سائق التوك توك .. فنزلت لمقابلته وجرى الحوار :
******** المشهد الثاني ********
سائق التوك توك: يعني يرضيك كده يابيه اللي انت عملته ده ... ؟!
أنا: أنا برضه ؟ .. ولا انت اللي مش بترضى بحاجة ده انا كنت هاديك اكتر من حقك وانت مرضتش ده غير انك كلمتني وحش !!
سائق التوك توك: ماهو انت يا بيه كنت عايز تظلمني وبعدين خلاص يابيه انا آسف مكانش قصدي وانا موافق على اي حاجة تدفعها ..
أنا: مدام قلت كده خد 10 جنيه اهو وهات الباقي اللي انت عايزه ..
سائق التوك توك: لا يا بيه متحرجنيش وادفع اللي انت عايزه ..
أنا: خد 4 جنيه ياريس .. (بمزاجي بأه)
سائق التوك توك: (مغادراً) شكراً يابيه.
أنا: طب تعالى اشرب شاي (مع اني معنديش شاي) ..
سائق التوك توك: شكرا يابرنس ..
**************************
كنت سعيداً بعد هذا الموقف لإحساسي بأن سائق التوك توك ذهب وهو راض ..
وفي مساء اليوم التالي كنت اخترت أن أمشي من محطة المترو حتى أصل للبيت .. ولكن تشاء الظروف أن يقابلني نفس السائق مرة أخرى .. فتوقف ونزل ليسلم عليّ وجرى الحوار ..
******** المشهد الثالث ********
سائق التوك توك: ازيك يابيه .. فاكرني ؟؟
أنا: طبعا ازيك ياباشا ؟
سائق التوك توك: كله قشطة .. باقولك تعالى اركب يابيه واوعدك اني مش هافاصل معاك ابداً لاحسن ماتدينيش حاجة يا عم .. هههه
أنا: ههههه .. ماتخافشي احنا بأينا صحاب خلاص .. بس انا النهاردة عايز اتمشى ..
**************************
شكرته وعرفت عنه أشياء كثيرة منها أنه يعمل موظفاً بفترة النهار .. وها نحن أصبحنا أصدقاء ..
أنا سعيد اليوم لأني أملك صديقاً يمتلك التوك توك ولأني اكتسبت درسا جديدنشر الرسالةا : لما حد يقولك "خلي عنك يابيه" .. اشكره وامشي ..
هناك تعليقان (2):
4 جنيه فتوصيله بتوك توك كتير جدا علي فكره تعالي اركبه عندنا ارخص :))
عارف حضرتك ان الناس بقت مستغله جدا وكل واحد عاوز ياخد اكتر من حقه ولو طال يمد ايده فجيبك وياخد كل اللي فيه هايعمل كده
تخيل اني عشان مره كنت راكبه تكتك ووقفته و نزلت اشتري فاكهه البياع ادهالي اكتر من تمنها وكل ده عشان راكبه توكتوك قالك مادام قادره تدفع الجنيه بتاعه ( عندنا الاجره جنيه ) يبقي مش هاتدقق :))
امال لو كنت راكبه مرسيديس كان عمل فيا ايه ههههه
ههههههههههه
ضحكتني اوي حكاية الفكهاني دي .. وبعدين انا شكلي اضحك عليا فعلا .. ده انا المرة الجاية مش هاديله فلوس اصلا .. وياريت تقوليلي فين التوك توك اللي بجنيه ده .. باشكرك لانك نورتنيني في المدونة المتواضعة دي .. وأتمنى حضرتك تنوريني دايماً
إرسال تعليق